मनोरंजन

ईथल्या मेट्रोमध्ये फिरताना माझं मनोरंजन झालं नाही असं क्वचितच होतं. आता आजचंच बघा ना!

ट्रेनमध्ये बसत नाही तोच धाड घालायला आल्यासारखं ७-८ लोकांचं टोळकं तिकीट चेक करायला आलं. माझ्या काटकोनातल्या सीटवर एक जोडपं त्यांच्या श्वानावर प्रेमाचा वर्षाव करत होतं. काकुंनी मास्क लावलेला नव्हता. 

एक तिकिटाचेकर काकु त्यांच्याजवळ आल्या आणि मानभावीपणे म्हणाल्या “तिकीट दाखवा, मास्क लावा आणि जरा तुमच्या कुत्र्याला आवरा!” 

कुत्र्याला आवरा!! जर्मन असुन हि भाषा? मी तर बुचकळ्यातच पडले. इथल्या लोकांचं श्वानप्रेम पुर्ण ब्रम्हांडात प्रसिद्ध आहे! 

ते वाक्य ऐकून मास्क न लावलेल्या काकुंच्या डोक्यात तिडीक गेली बहुदा. त्यांनी जे सुरु केलं “कुत्र्याला यावर काय? हं? अंगावर आला का तुमच्या कि चावा घेतला तुमचा? फिरतोय जरा इकडे तिकडे तर काय अडचण आहे तुम्हाला? आणि मास्कचं म्हणाल तर आताच आले मी ट्रेनमध्ये लावते ना. एवढी काय घाई आहे? मला कोरोना आहे का? हं? हे घ्या तिकीट. करा एकदाचं चेक!“

हे ऐकुन तिकीर चेकर काकुंचा पारा चढला, त्या तिरीमिरीत म्हणाल्या “तुमच्या नवऱ्याने मास्क लावलाय अन तुम्ही तश्याच फिरताय मेट्रोमध्ये. तुमच्या कुत्र्यामुळे लोकांना त्रास होतोय त्याचं काय? तिकीटही उद्या संपतय तुमचं! बेजाबदार नागरीक नुसते!“

माझं आपलं घेणं ना देणं अन फुकटचं कंदिल लावणं “हं असंच पाहिजे!“

तिकीट चेकर काकूंचं बोलणं ऐकुन श्वानप्रेमी काकु चवताळल्या “हि मेट्रो आहे तुमचं घर नाहीये. मला तुम्ही शिकवायची गरज नाहीये सांगुन त्ये ठेवते. माझं श्वान आहे ते, कुत्रं नाही! तिकिटं बघितले ना आमचे तुम्ही, निघा आता!“ 

तिकिटचेकर काकु रागाने थरथरत होत्या. त्या चिडुन म्हणाल्या “हो हो चालले आहे. तुमच्यासारख्या बेजबाबदार बाईशी बोलायची माझीही ईच्छा नाहीच्चे!” एव्हाना श्वानप्रेमी काकुंचं श्वानहि गुरगुरायला लागलं होतं. 

मला वाटलं आता बाचाबाची, हाणामारी, झिंज्या उपटणे इत्यादी ह्याची देही ह्याची डोळा म्युनिकमधल्या बायकांचं बघायला मिळेल पण.... 

श्वानप्रेमी काकुंच्या नवऱ्याने त्यांना आणि तिकिटाचेकर काकूंच्या टोळक्याने त्यांना आवरल्यामुळे पुढच्या मनोरंजनास मी मुकले!

#माझी_म्युनिक_डायरी