इथले वर्तमानपत्र वाचल्यावर आपल्याकडचा संध्यानंद वाचल्यासारखा वाटतो कधी कधी. मागे #कोंबडा होता आणि आज काय तर म्हणे #कोळी!
इथल्या लोकांना कुत्रे मांजरी सोडुन दुसरे प्राणी माहीतच नाहीयेत बहुतेक. आपल्याला जसं लहानपणापासुन घरात पाली, कोळी, लहानसहान किडे बघायची सवय आहे तसं इथं फक्त कुत्रे मांजरी बघुन मोठे होतात वाटतं मुलं!
तर बातमी अशी आहे कि एका काकुंनी म्हणे कारमध्ये कोळी घुसल्याच्या शंकेवरून पोलिसांना बोलावलं! इथे साधारणपणे कोणी शेजाऱ्यांच्या आवाजाचा त्रास होतो म्हणून, तर कोणी चोरांच्या भीतीने पोलिसांना बोलवतात, पण कोळी दिसला म्हणुन पोलिस? अरे कुठे नेऊन ठेवलीये पाल?
तर, त्या काकूंना वाटलं कि एक मोठ्ठाच्या मोठ्ठा कोळी त्यांच्या कारमध्ये आलाय जेणेकरून त्यांना कार चालवणं शक्यच झालं नाही. का? तर त्यांना कोळी भयाने ग्रासलेलं होतं म्हणे! कोळीमाणुस नावाचा चित्रपट कसा बघितला असेल मग काकूंनी? स्पायडरमॅन हो!
पोलिसांनी पण डोक्यावर पडल्यागत मोठठया कोळ्याला पकडायला मोठ्ठ सर्च ऑपरेशन लॉंच केलं म्हणे. एवढं करून कोळी सापडला नाहीच. कोहळ्याचा नावाखाली आवळाही मिळाला नाही! मला प्रश्न पडायचाच कि इथले पोलिस नक्की काय काम करतात!
बरं अश्या टरकेश्वर लोकांची संख्या बरीच असावी कारण ह्यापुर्वीही घरात, बाथरूम मध्ये कोळी आहे म्हणुन लोकांनी पोलिसांना बोलावलं आहे म्हणे! उद्या ह्यांना पाल दिसली तर घरातल्या भिंतीवर मगर आहे म्हणुन पोलिसांना बोलावतील कदाचित.
मलाही खिडकीच्या काचेवर मोठे डास दिसतात, मधमाशी, लेडीबग्ज, भुंगे, माश्या थेट घरात येतात तर पोलिसांना बोलावुन बघुच म्हणलं एकदा! हाय काय अन नाय काय.
सौ. राजश्री उपेंद्र पुराणिक
#माझी_म्युनिक_डायरी
कोणत्याही टिप्पण्‍या नाहीत:
टिप्पणी पोस्ट करा