बाकी काहीही म्हणा पण लेडीजबायकांचे वेगळेच फण्डे असतात. कोणाचं काय तर बायकांचं तिसरंच असतं काहीतरी. आता आजचच बघा ना!
कालपासून गरम पाणी येत नाहीये नळाला. आधीच हाडं गोठवणारी थंडी, -७ वगैरे; त्यात गरम पाण्याची वानवा म्हणजे बर्फात तेरावा महिना! अंघोळीची गोळी तरी किती दिवस घेणार? बरं अंघोळ एकवेळ विसरा पण भांडे घासायला, दिवसभर वापरायला पण थंडगार पाणी म्हणजे घरात बसल्या बसल्या फ्रॉस्टबाईट व्हायचे कामं. विचार करूनच अंगावर काटा येतो!
म्हणुन मॅगी काकूंना विचारावं म्हटलं. त्यांचं दार वाजवलं. मला वाटलं दार उघडतात की नाही देवच जाणे. त्यांच्या मूडवर असतंय! पण चक्क त्यांनी दार उघडलं. चेहऱ्यावर मास्क! मी लगेच “ एक मिनिट हं काकू, मी पण मास्क लावते!“ तर म्हणाल्या “असुदे ग." आज मूड भारीच दिसतोय काकूंचा! चला आज मदत करतील बहुदा.
मी: आमच्यकडे कालपासून गरम पाणी नीट येत नाहीये. तुमच्याकडे येतंय का?
का: थांब हं मी बघते. येतं आहे ग, बाथरूम आणि किचन दोन्हीकडे.
मी: अरेच्या, आमच्याकडे कालपासून नाहीये बघा! मी खाली कम्प्लेंट लिहुन आले आताच."(मला वाटलं विचारतात कि काय अंघोळ झाली का म्हणुन!)
का: तुझ्या जॅकेटचं फर फारच सुंदर आहे ग!
मी: (ह्यां,चक्क कम्प्लेंटच्या ऐवजी कॉम्प्लिमेंट! ये सपना तो नहीं है ना? मन में लड्डू वगैरे) धन्यवाद!
का: पण हे फर खरं आहे का?
मी: (आता आली का पंचाईत? ईथं कोणाला कळतंय खरंय का खोटं आहे ते!)”मला नाही माहीत हो!”
का: कुठे घेतलंस जॅकेट? मी सांगु शकेल मग!
मी: ते तमुक नाही का.. तिथे!
(काकुंच्या चेहऱ्यावर तेच ते भाव... कौन है लोग इत्यादी)
का: अच्छा तमुक का! मग नाहीये खरं हे फर. पण छानच दिसतंय!
मी: (आता काय बोलावं ते न सुचून) हो का? अरेवा! तुमचेही हे दारात ठेवलेले शूज मस्त आहेत!
का: अगं हे त्या अमुक तमुक ब्रँडचे आहेत! ह्याला ना आतुन खरं फर आहे!
मी: (आयला पुन्हा खरं फर.. एकतर ते नाव ऐकून आणि त्याची किंमत आठवून माझे डोळेच पांढरे झाले.) अरेवा मस्त मस्त!
का: “तुला ना मी २-४ दुकानांचे नावं सांगते तिथे तुला खऱ्या फरचे जॅकेट्स मिळतील. फार सुंदर असतात बघ.
मी: सांगा ना आणि अजुन दुसरे शूज चे दुकानं पण सांगा!
का: तुला चष्मा लागला का ग?
मी: हो, झालं आता वर्ष, पण काम करतांनाच घालावा लागतो!
का: अच्छा. छान दिसतोय तुला. कुठे घेतलास?
मी: हे आपल्या इथलं जवळचं दुकान.
का: हं, ते छान आहे!
(अरेच्या ते दुकान आवडतं काकूंना..)
हे सगळं फर पुराण ऐकुन घरात असलेला होम ऑफीसवाला माणुस ओरडला ”गरम पाणी!! गरम पाणी!!!”
अरे हां गरम पाणी येत नाहीये ना, असं विसरायला होतं बघा!!
सौ. राजश्री उपेंद्र पुराणिक
#माझी_म्युनिक_डायरी
कोणत्याही टिप्पण्‍या नाहीत:
टिप्पणी पोस्ट करा